Музејот на град Скопје бил формиран во 1949 година, по Втората светска војна, кога бил именуван како Народен музеј на град Скопје. По катастрофалниот земјотрес во Скопје и по санацијата, во 1971 година, Музејот на град Скопје бил сместен во зградата на Старата железничка станица, изградена во 1939 година, по проект на архитектот Велимир Гавриловиќ. Зградата како Споменик на културата е ставена под статус на заштита во 1971 година. Денес, музејот се протега на 4670 м2, од кои 1500 м2 се изложбен простор. Во состав на музејот се и депандисите Музејот на Старата скопска чаршија – сместен во Сули Ан, споменик на култура од 19 век и Меморијален музеј на илегалните работници за производство на оружје за време на НОБ.

          Музејот на град Скопје е културна установа која има за цел да истражува, собира, чува, документира, заштитува, презентира и публикува музејски материјал од областа на археологијата, историјата, етнологијата, историјата на уметноста и архитектурата на градот Скопје и неговата околина.

          Комплексноста на музејот се отсликува преку разновидноста на тематиката која ја обработуваат стручни одделенија: археолошко, историско, потоа одделение за етнологија, за историја на уметност и за архитектура.

          Бројот на музејски предмети во Музејот на град Скопје, ја надминува бројката од 40.000 музејски артефакти, од кои голем дел се презентирани и публикувани. Освен постоечките музејски збирки, Поседува и донации од различни области на културата.

          Структурата на музејот ја сочинуваат одделенијата за обработка, чување, користење на документација за движно културно наследство, потоа за едукација и водичка служба и конзервација и реставрација на музејскиот материјал. Библиотеката на музејот располага со богат библиотечен фонд со вкупно 7109 наслови, од кои 400 наслови на ретки и стари книги, кои потекнуваат од крајот на 19 и почетокот на 20 век.

          Издавачката дејност на музејот се претствува преку богатиот фонд на каталози од различни ликовни и тематски изложби, но и неколку монографски изданија кои ја презентираат богатата историја на градот Скопје, преку објавувањето на богатото археолошко наследство, средновековната сакрална уметност, културниот живот во градот и неговата архитектура.

          Музејот за својата 70 годишна работа има добиено награди, благодарници, плакети и признанија.

Ул. „Св. Кирил и Методиј“ бб, 1000 Скопје
Тел. +389 23115 369
https://museumskopje.mk